Prindër me fëmijë përdore apo në krahë janë vendosur në radhë që prej mëngjesit në spitalin e Laçit për të bërë një vizite tek okulisti. Dyndja e madhe vjen pak ditë para fillimit të vitit të ri shkollor. Siç dihet tashmë ndër dokumentet që duhet të dorëzojnë prindërit për fëmijët që ulen për herë të parë në bankat e shkollës është edhe një vertetim nga okulisti.
Qytetarët që prisnin në radhë kanë dërguar pamjet në rubrikën “Ti raporton” në TCH. “Është për të ardhur keq, thotë qytetari, se si fëmijët janë të detyruar të rrinë në radhë për të kryer kontrollet, ndërkohë që, siç raporton ai, mjeku nuk ishte paraqitur ende në punë”.
Por jo vetëm tek okulisti. Prindërit e fëmijët mbajnë radhë edhe në librari këto ditë për tu pajisur me librat shkollore, duke e kthyer në stres atë që duhet të ishte një ditë e gëzuar “kthimi në shkollë”. /Opinion.al
