Teksa ka folur për incidentin e ndodhur ndaj tij, dhe vërtetimin mjekësor të publikuar në media, për 31-vjeçarin që e qëlloi në protestë, Berisha ka akuzuar qeverinë se ka bërë gjithçka gati dhe se sulmi ishte i përgatitur.
Berisha thotë se vërtetimi mjekësor nuk ka asnjë datë ndërsa shton se nuk dëshmon asgjë tjetër, përveç faktit se qeveria e kishte bërë gati për të mashtruar dhe për të justifikuar aktin e një agjenti të policisë.
“Këtu thuhet, dëgjoni se është një gjë shumë interesante. Vërtetim mjekësor për tu përdorur kudo që ti nevojitet, por ky vërtetim mjekësor miqtë e mi nuk ka asnjë datë. Ai që lexon këtë, thotë se ky, mund të jetë i vitit 2018, mbasi thotë u paraqit në klinikën tonë në 10 janar 2018. Por shumë i çuditshëm vërtetimi sepse thotë gjithashtu se, episodi i fundit i 10 gushtit 2022, u rekomandua të dërgohet në urgjencën psikiatrike dhe pasi mori ndihmën e parë u rikthyer në shtëpi i qetësuar.
Pra ju e kuptoni se kjo nuk dëshmon asgjë tjetër, përveç faktit se qeveria e kishte bërë gati për të mashtruar, për të justifikuar aktin kriminal të një agjenti të policisë kriminale të përdorur nga Çuçi i familjes me porosi të Ramës”-tha Berisha.
