Prokuroria e përgjithshme ka nxjerrë sot një njoftim për mediat ku sqaron punën e saj në lidhje me verifikimet e bëra deri tani për rastin e Valdrin Pjetrit dhe Agim Kajmakut pasi Partia Demokratike publikoi dokumente të cilat tregonin se ata kishin patur probleme me drejtësinë në vendet fqinje.
Prokuroria njofton se më datë 23 Gusht ka regjistruar kërkesën e Partisë Demokratike për verifikim të thelluar për subjektin Agim Kajmaku.
Brenda 7 ditësh prokuroria i ka dërguar kërkesë të gjithë institucioneve kompetente për verifikimin e të dhënave të Agim Kajmakut. Gjithashtu prokuroria njofton se i ka kërkuar gjurmët e gishtërinjve Kajmakut të cilat i ka marrë nën administrim në datë 28 gusht dhe më 29 gusht ato i janë përcjellë Interpolit për krahasim.
“Më datë 30.08.2019 i është kërkuar Ministrisë së Drejtësisë, për të komunikuar me autoritetet Greke të drejtësisë, me qëllim konfirmimin e autenticitetin e dokumentit (Vendim i Prokurorisë së Apelit Janinë), administrimin e çdo vendimi penal të marrë ndaj subjektit (vendim masë sigurie, dënimi) si dhe krahasimi i gjurmëve daktiloskopike të subjektit. Bashkëlidhur është dërguar kopja e vendimit të Prokurorisë së Janinës dhe gjurmët daktiloskopike të shtetasit Agim Kajmaku” shkruhet në njoftimin e prokurorisë duke shtuar se janë “në pritje të përgjigjes nga autoritetet greke të drejtësisë dhe atyre policore, të cilat janë vendimtare për marrjen e një vendimi”.
Ndërsa për rastin e Valdrin Pjetrit, prokuroria njofton se ka regjistruar kërkesën për verifikim më 5 gusht. Pas administrimit të dokumenteve nga institucionet vendase ku përfshihet edhe formulari i vetëdeklarimit të zotit Pjetri, prokuroria ka nisur kërkesën në Ministrinë e Drejtësisë “për ndihmë juridike për subjektin Valdrin Pjetri, duke bashkëngjitur të dhënat kriminale të dënimit penal në shtetin italian”.
“Jemi në pritje të përgjigjes nga autoritetet italiane të drejtësisë, si dhe të përgjigjes nga autoritetet policore italiane, të cilat janë vendimtare për marrjen e një vendimi” deklaron prokuroria në fund të njoftimit të saj. /Opinion.al
