Policia e Shtetit ka reaguar në lidhje me një video që po qarkullon në rrjetet sociale, ku një punonjës policia kryen veprime të turpshme ndaj një vajze.
Në reagimin e Policisë, thuhet se efektivi ka shkelur Kodin e Etikës dhe Rregulloren e Policisë së Shtetit, duke cenuar imazhin e Policisë.
Mësohet se Drejtori i Përgjithshëm i Policisë së Shtetit ka urdhëruar Drejtorinë e Standardeve Profesionale në Policinë e Shtetit dhe Drejtorinë Vendore të Policisë Tiranë për të filluar menjëherë hetimin disiplinor ndaj policit që shfaqet në video.
Drejtoria e Standardeve Profesionale dhe Tiranë, pas verifikimeve të kryera dhe hetimit të bërë, identifikuan punonjësin e Policisë, i cili është shtetasi M. K, punonjës i Patrullës së Përgjithshme të Komisariatit të Policisë Nr. 3.
Për këtë punonjës u bë pezullimi nga detyra dhe u mor masa e përjashtimit nga Policia e Shtetit, për shkelje të rëndë të Rregullores së Policisë së Shtetit./ Opinion.al
