Udhëheqësi i opozitës në Venezuelë, Juan Guaido, bëri thirrje që ushtria dhe populli t’i bashkohet drejt asaj që ai e quajti fazën përfundimtare të operacionit të lirisë.
Guaido, i cili është kreu i Asamblesë Kombëtare të Venezuelës prej muajsh proteston kundër qeverisë së Nicolas Maduro ndërsa duket se tashmë konflikti ka arritur në pikën më të nxehtë pasi ai ka bërë thirrje ushtrisë për një grusht shteti për të rrëzuar udhëheqësin socialist Maduro.
“Tani është momenti. Do të sjellim lirinë dhe demokracinë për Venezuelën. Sot ushtarët trima, patriotë të guximshëm, burra të guximshëm që mbështesin kushtetutën, i janë përgjigjur thirrjes tonë”, tha ai në një video postuar prej tij në Twitter ku shihet i rrethuar nga roje ushtarake të armatosura rëndë.
Megjithëse është ndër vendet me resurset më të mëdha të naftës, Venezuela është përballur së fundmi me kolaps ekonomik dhe një krizë humanitare të thellë.
Lideri i opozitës Juan Guaido është vetëshpallur president dhe është njohur nga Bashkimi Europian dhe Shtetet e Bashkuara të Amerikës, ndërsa presidenti aktual Nicolas Maduro nuk pranon të largohet dhe mbështetet nga Rusia, Kina, Irani, Kuba, Turqia dhe Bolivia./Opinion.al
