Dy anëtarë të opozitës në parlamentin e Venezuelës kanë kërkuar strehim në ambasadat e huaja.
Ata janë në mesin e 10 deputetëve, të cilëve u është hequr imuniteti, pasi Gjykata Supreme vendosi se ata duhet të hetohen për konspiracion, rebelim dhe tradhti ndaj atdheut.
Ministria e Jashtme e Italisë ka njoftuar se në ambasadën e këtij shteti është strehuar njëri nga deputetët ndërsa tjetri gjendet në ambasadën e Spanjës.
Situata në Venezuelë është përshkallëzuar prej kur Guaido e ka shpallur veten president të përkohshëm dhe ka mbajtur një varg protestash në rrugë, ndërsa përshkallëzoi protestën kur tentoi të nisë rebelim ushtarak kundër presidentit të kontestuar, Nicolas Maduro javën e kaluar.
Guaido e ka shpallur veten president të përkohshëm në muajin janar. Legjitimiteti i tij është njohur nga 50 kombe, duke përfshirë Shtetet e Bashkuara dhe pjesën më të madhe të vendeve të Amerikës Latine, ndërsa Maduro vazhdon të ketë mbështetjen e Kinës dhe Rusisë./Opinion.al
