Agjentët e inteligjencës në Venezuelë kanë arrestuar Roberto Marreron, shef i shtabeve të udhëheqësit të opozitës Juan Guaido, si dhe krahu i djathtë i tij. Sipas Reuters agjentët kishin bastisur rezidencat e tij në kryeqytetin Caracas në orët e para të mëngjesit të sotëm.
Sapo u njoftua për lajmin, lideri i opozitës ka kërkuar lirimin e menjëhershëm të shefit të stafit të tij. Ai tha se ky operacion sinjalizon goditje nga Presidenti Maduro ndaj opozitës.
Autoritetet bastisën edhe banesën e deputetit opozitar Sergio Vergara që ndodhej pranë banesës së Marrero, por ligjvënësi nuk u arrestua. Ai bëri me dije se u ndalua shoferi i tij.
Lideri i opozitës, Juan Guaido, që është njëkohësisht kreu i Asamblesë Kombëtare, u vetëshpall Presidenti i Venezuelës më 23 Janar. SHBA dhe rreth 54 vende të tjera Perëndimore e kanë pranuar legjitimitetin e tij.
Guaido ka kërkuar nga Presidenti Maduro të japë dorëheqjen, me pretendimin se rizgjedhja e tij në krye të vendit ka qenë e paligjshme. Por, Presidenti Maduro ka refuzuar çdo ultimatum të liderit të opozitës dhe të SHBA-së e Perëndimit. Në krah të Nicolas Maduro kanë dalë shtete si Kina dhe Rusia./Opinion.al
