Një tjetër ndërprerje energjie elektrike ka mbërthyer kryeqytetin e Venezuelës, Karakasin, duke e zhytur sërish në errësirë e duke prekur edhe rajone të tjera. Opozita tha se korrupsioni dhe mungesa e investimeve kanë lënë këtë shtet pa sistem funksional të energjisë elektrike, ndërsa Maduro ka thënë se problemet janë krijuar me qëllim nga armiqtë politikë, për tentativa të grushtshtetit me ndihmën e atyre që i quan “imperialistë amerikanë’.
Ndërprerja e energjisë elektrike ka shkaktuar kaos në sistemin e transportit publik të Karakasit, metroja u mbyll dhe mijëra njerëz u kthyen në shtëpi më këmbë apo me autobusë ndërsa spitalet janë jashtë funksionit. Këto ndërprerje janë të shpeshta në Venezuelë, vend në të cilin ekonomia është duke u përballur me inflacion tejet të lartë, si dhe ka mungesa të mëdha të ushqimit dhe ilaçeve.
Më herët këtë muaj, një ndërprerje energjie në shkallë kombëtare çoi në shpërthim grabitjesh dhe dëshpërim. Situata në Venezuelë është tensionuar pasi lideri opozitar, Juan Guaido, është njohur nga Shtetet e Bashkuara dhe një varg i shteteve perëndimore si president i përkohshëm, ndërsa Mauduro që është betuar në mandatin e dytë muaj më parë, refuzon të largohet nga pushteti i mbështetur nga shtete si Kina dhe Rusia./Opinion.al
