Presidenti i Venezuelës Nicolás Maduro deklaroi se dy shtetas amerikanë janë arrestuar pas asaj që ai tha se ishte një përpjekje për ta rrëzuar atë.
Maduro tha që të dy burrat ishin pjesë e një grupi “mercenarësh”, hyrja e armatosur e të cilëve në Venezuelë nga deti ishte ndaluar të dielën.
Autoritetet vendase thanë se tetë burra të armatosur u vranë gjatë përpjekjes së pretenduar për grusht shteti.
Në një transmetim të drejtpërdrejtë të hënën, Maduro shfaqi ato që ai tha se ishin pasaportat e dy amerikanëve të arrestuar – Airan Berry dhe Luke Denman – të cilët punojnë për një kompani të sigurisë me bazë në Florida.
Qeveria e Venezuelës tha që grupi i “mercenarëve terroristë” ishte nisur nga Kolumbia dhe kishte zbritur në qytetin Macuto, rreth 34 km në veri të kryeqytetit Caracas, të dielën, përpara se të përgjoheshin dhe të bëheshin arrestimet.
Prokurori i Përgjithshëm Tarek William Saab bëri një mesazh në Twitter, duke thënë se grupi “po kërkonte të shkaktonte një grusht shteti dhe një atentat”.
Nuk dihet ende shumë për Luke Denman, 34 vjeç dhe Airan Berry, 41 vjeç.
Komanda e lartë ushtarake e Venezuelës tha që dyshja ishin anëtare të forcave të sigurisë amerikane. Mediat amerikane kanë sugjeruar se ata janë ish anëtarë, por kjo nuk është konfirmuar.
Kur u pyet për ta të martën në mëngjes, Presidenti Trump tha: “Ne do ta zbulojmë. Sapo kemi dëgjuar për të”, duke shtuar se ata nuk kishin asnjë lidhje me qeverinë.
Jordan Goudreau, një ish anëtar i forcave speciale të ushtrisë amerikane tha se drejtonte grupin.
Ai i tha agjencisë së lajmeve Reuters: “Ata po punojnë me mua. Ata janë djemtë e mi”.
Goudreau drejton një firmë private të sigurie me seli në Florida të quajtur Silvercorp dhe tha që ai ishte një nga organizatorët e komplotit.
Sipas një hetimi nga agjensia e lajmeve Associated Press, Goudreau është përfshirë me një grup ish-ushtarësh venezuelianë, të cilët dyshohet se kanë trajnuar dezertorë nga forcat e sigurisë të Venezuelës në kampe sekrete në Kolumbi.
Ata raportohet se kanë planifikuar hyrjen në Venezuelë. Plani thuhet se ka përfshirë sulmin e bazave ushtarake me shpresën për të ndezur një rebelim popullor që do të përfundonte në rrëzimin e presidentit Maduro.
Në raportin e tyre, të lëshuar të Premten, AP tha se nuk kishte gjetur prova të përfshirjes së qeverisë amerikane në këto komplote.
Goudreau ka bërë vazhdimisht deklarata mbështetëse për liderin e opozitës në Venezuelë, Juan Guaidó, i cili njihet nga më shumë se 50 vende si udhëheqësi legjitim i Venezuelës. /Opinion.al
