Komisioni i Venecias ka miratuar raportin përfundimtar për çështjen e kushtetutshmërisë së vendimit të Presidentit Ilir Meta për anulimin e datës së zgjedhjeve të 30 qershorit.
Pas mbledhjes me përfaqësuesit e Presidencës dhe mazhorancës, në raportin përfundimtar janë shtuar vetëm disa amendamente të palëve por thelbi ka mbetur i njëjtë me atë të draftit të publikuar disa ditë më parë. Për ekspertët e Venecias, Meta ka tejkaluar kompetencat me anulimin e datës së zgjedhjeve por nuk ka kryer shkelje të rëndë për tu shkarkuar.
“Edhe nëse Presidenti mund të ketë tejkaluar kompetencat me shtyrjen e zgjedhjeve lokale, shkarkimi mund të mos justifikohet”, theksohet në raportin e Komisionit të Venecias.
Ekspertët e Venecias theksojnë se Presidenti nuk mund të shtyjë zgjedhjet pa konsensus politik, gjithsesi, vënë në dyshim nëse kjo mund të konsiderohet një shkelje serioze.
“Edhe në rastet e emergjencave shtetërore, si lufta apo katastrofat natyrore, Parlamenti duhet të miratojë një legjislacion ‘ad hoc’ për të shtyrë zgjedhjet. Në përgjigje të krizës politike në vend dhe bojkotit elektoral nga disa parti të mëdha politike, Presidenti fillimisht anuloi dhe më pas i shtyu zgjedhjet lokale. Edhe nëse Parlamenti mund të konfirmojë se Presidenti ka tjekaluar kompetencat, Komisioni i Venecias vë në pikëpyetje nëse kjo është e një karakteri të tillë sa të provojë “shkelje serioze”, thuhet në opinionin e Komisionit./ Opinion.al
