Byroja e drejtuar nga kreu i kuvendit Gramoz Ruçi vendosi të përjashtojë 10 ditë nga punimet e parlamentit, deputetët e PD dhe LSI, që sipas mazhorancës krijuan trazira gjatë seancës për zgjedhjen e kryeprokurores, Arta Marku, të hënën e 18 Dhjetorit.
Vendimi është marrë nga anëtarët e majtë të Byrosë së Kuvendit. Sakaq u përjashtua 5 ditë nga parlamenti edhe deputeti i PS, Çela i cili ka shtyrë deputeten Kejdi Mehmetaj. Bujar Çela i ishte drejtuar me një letër Byrosë ku kërkonte të dënohej per veprimin e kryer ndaj koleges së LSI-së.
Teksa zhvillohej mbledhja, të rinjtë e LRI-së janë mbledhur para dyerve të kryesisë së Kuvendit, në shenjë proteste ndaj masave që socalistët morën për deputetët e LSI-së.
Më herët, mbledhja është shoqëruar me debate të forta, pasi opozita ka kërkuar që të bëhet në praninë e medias. Por kërkesa e tyre është hedhur poshtë nga kryetari i Kuvendit, Gramoz Ruçi.
Sesioni i ri plenar që nis javën e dytë të Janarit do të zhvillohet pa deputetët e opozitës. Kujtojmë se nga ana tjetër opozita ka paralajmëruar valë protestash në vend në fillim të Janarit.
Deputetët e përjashtuar janë:
Nga PD: Ervin Salijanji, Endri Hasa, Flamur Noka, Bardh Spahia
Nga Lsi: Monika Kryemadhi, Endrit Brahimllari, Kejdi Mehmetaj
/Opinion.al
*Nga protesta para Kryesise së Kuvendit
