Vendimi për sulmin ajror në aeroportin e Bagdadit, nga ku mbeti i vrarë Gjenerali i Gardës Revolucionare të Iranit, Qassem Soleimani si dhe Abu Mahdi al-Muhandis, shefi i policisë së Iranit, ka shkaktuar jo pak trazira dhe reagime në rradhët e ligjvënësve amerikanë.
Udhëheqësi demokrat i Komitetit për Marrëdhënie me Jashtë në Dhomën e Përfaqësuesve, Eliot Engel ka thënë se sulmi i kryer në Bagdad kundër Soleimanit ka ndodhur pa njoftim apo konsultim me Kongresin.
Engel ka thënë se vërtetë Soleimani ka qenë organizator i një dhune të jashtëzakonshme dhe kishte gjak të shtetasve amerikanë në duart e tij, mirëpo marrja e një vendimi të këtij niveli pa përfshirë Kongresin krijon probleme të mëdha ligjore.
Agjencia prestigjoze e lajmeve, AFP shrkuan se as udhëheqësi i demokratëve në Senat, Chuck Schumer nuk është njoftuar paraprakisht për sulmin.
Ligjvënësit republikanë në anën tjetër kanë mirëpritur vrasjen e komandatit iranian, duke përmendur mbrojtjen e territorit amerikan.
“Faleminderit zoti president që keni mbrojtur Amerikën”, ka thënë senatori Lindsey Graham përmes një postimi në Twitter. Ai po ashtu ka thënë se “nëse Irani vazhdon të sulmojë Amerikën dhe miqtë tanë, ata do të pagujnë çmim më të lartë, që përfshin shkatërrim të rafinerive të tyre të naftës”.
Shtëpia e Bardhë tradicionalisht njofton anëtarët e lartë të Senatit dhe Dhomës së Përfaqësuesve të të dyja partive, para marrjes së ndonjë vendimi të madh ushtarak, por duket se kësaj here një gjë e tillë nuk ka ndodhur.
Kujtojmë se ky akt erdhi pasi Ambasada amerikane në kryeqytetin irakian të Bagdadit, u sulmua nga një turmë demonstruesish, të zemëruar nga vrasja e militantëve të lidhur me Iranin, gjatë sulmeve ajrore të SHBA-së më 29 dhjetor 2019, që lanë të vdekur të paktën 25 persona të grupit militant të mbështetur nga Irani, Kataeb Hizbullah.
Presidenti amerikan, Donald Trump fajësoi menjëherë Iranin për sulmin dhe tha se “do të paguajë një çmim shumë të madh” për çdo dëmtim ose humbje të jetës.
“Ky nuk është një paralajmërim, por një kërcënim”, shtoi ai./Opinion.al
