Një nga problemet që shqetëson shqiptarët këndej dhe andej kufirit është heqja e Roaming midis Shqipërisë dhe Kosovës, që do të ulte koston e telefonatave.
Më 30 maj të vitit të kaluar, 11 deputetë të Kuvendit të Kosovës, bënë një kërkesë për heqjen e Roaming midis dy vendeve, por ende edhe sot kjo nismë ka mbetur thjesht në letër edhe pse Kuvendi i Kosovës e miratoi nismën me 69 vota.
Në shtator të vitit 2018, Ministri i Zhvillimit Ekonomik të Kosovës, Valdrin Lluka, tha se heqja e Roaming ishte çështje javësh, por sërish një gjë e tillë nuk ndodhi.
Tashmë është vetë kabineti i ministrit Lluka që ka dhënë një datë se kur do të hiqet roaming midis dy vendeve.
“Marrëveshja e nënshkruar e parasheh implementimin e marrëveshjes së roamingut në qershor 2019”, thuhet në përgjigjen e tyre ndaj Indeksonline.
Heqja e Roamingut është një nga shërbimet më të rëndësishme që do t’iu mundësojë qytetarëve dhe bizneseve të Kosovës dhe Shqipërisë komunikim shumë më efikas dhe më të lirë. /Indeksonline/
