Presidenti turk Rexhep Tajip Erdogan ka reaguar lidhur me vendimin e presidentit rus Vladimir Putin për të njohur pavarësinë e territoreve të shkëputura të Ukrainës Lindore, duke e quajtur atë “të papranueshëm”.
“Vendimi i Rusisë për të njohur të ashtuquajturat Republika Donetsk dhe Luhansk është në kundërshtim me Marrëveshjet e Minskut”, u tha Erdogan gazetarëve gjatë një udhëtimi në Senegal të martën.
“U theksua se ky vendim përbën një shkelje të qartë të unitetit politik, sovranitetit dhe integritetit territorial të Ukrainës”, shtoi ai. “Ne e konsiderojmë këtë vendim të Rusisë të papranueshëm”, tha Erdogan.
Presidenti turk u bëri thirrje të gjitha palëve që të tregonin vetëpërmbajtje dhe deklaroi se Turqia është e hapur për të marrë pjesë në samitin e propozuar nga Presidenti i Ukrainës, Volodymyr Zelensky.
Erdogan shtoi se Turqia po merr masa paraprake në rast të një përshkallëzimi të armiqësisë rreth Detit të Zi.
“Meqenëse jemi një vend i Detit të Zi, duhen marrë masa paraprake,” tha ai./Opinion.al
