Kuvendi i Shqipërisë do të mblidhet përsëri ditën e hënë në orën 17:00, për të tretën herë për këtë legjislaturë.
Kryetarja e re e Kuvendit të Shqipërisë, Lindita Nikolla ka marrë vendimin e parë duke thirrur në seancë plenare deputetët në ditën e parë të javës.
Në rendin e ditës janë; zgjedhja e Byrosë dhe përbërja e sekretariateve, caktimi i kryesive të komisioneve parlamentare dhe caktimin e anëtarëve zëvendësues.
Të premten u zhvilluan dy seancat e para parlamentare, paradite në 10:00 nisja e legjislaturës dhe pasdite në 17:00 betimi i deputetëve dhe zgjedhja e kryetares së parlamentit, Lindita Nikolla.
Partia Demokratike në mënyrë demonstrative grisi fletën e votimit, duke mos e ushtruar të drejtën e votës për kryetaren e Parlamentit. Por tjetër qëndrim mbajti LSI deputetes e së cilës votuan, por më pas deklaruan se vota e tyre ishte kundër. Nga radhët e opozitës votoi edhe kreu i PBDNJ, Vangjel Dule, i cili ndodhet në Kuvend për shkak se ishte në listën e PD në zgjedhjet e 25 prillit.
