TIRANE- Gjykata Kushtetuese rrëzon vendimin e shumicës parlamentare që vendosi të mos çojë në këtë gjykatë kërkesën e Partisë Demokratike për heqjen e mandatit të Deputetit socialist Koço Kokëdhima.
Me vendimin numër 48/2015, Kuvendi nuk pranoi kërkesën e bërë nga një grup deputetësh të opozitës me argumentin se nuk përmbusheshin kushtet për të dëguar në Gjykatën Kushtetuese kërkesën e tyre. Por me, vendimin e zbardhur këtë të mërkurë, Gjykata Kushtetuese thotë se Kuvendi është i detyruar të dërgojë çështje të tilla në këtë gjykatë pasi është ai organik i vetëm që shqyrton çështjet me themel.
“Në rast se Kuvendi i Shqipërisë vihet në lëvizje me mocion të kryetarit të Kuvendit ose një të dhjetës së anëtarëve të tij, në kuptim të pikës 3 të nenit 70 të Kushtetutës, ai duhet të vendosë dërgimin e çështjes në Gjykatën Kushtetuese, e cila është organi i vetëm që ka kompetencën të shqyrtojë në themel çështjen dhe të vendosë mbi papajtueshmërinë e mandatit të deputetit” – thuhet në vendimin e Gjykatës.
Gjykata Kushtetuese ka vendosur konstatimin si të papajtueshëm me Kushtetutën të vendimit të marrë nga Kuvendit. Tashmë Kuvendi është i detyruar t’i drejtohet Gjykatës për të marrë një vendim për mandatin e Kokëdhimës.
Partia Demokratike e akuzon Deputetin Koço Kokëdhima për përfitim të fondeve publike në të paktën 150 raste, me anë të kompanisë “Abissnet” edhe pasi ai ishte bërë deputet.
Kokëdhima i ka hedhur poshtë akuzat duke thënë kompania “Abissnet” nuk kishte nënshkruar asnjë kontratë me institucionet shtetërore pas marrjes nga ana e tij të mandatit të deputetit. Kokëdhima i ka shitur aksionet e kësaj kompanie në Shkurt të vitit 2014.
Gjykata Kushtetuese vendosi: Pranimin pjesërisht të kërkesës, interpretimin e nenit 70/4 të Kushtetutës si vijon:
Në rast se Kuvendi i Shqipërisë vihet në lëvizje me mocion të kryetarit të Kuvendit ose një të dhjetës së anëtarëve të tij, në kuptim të pikës 3 të nenit 70 të Kushtetutës, ai duhet të vendosë dërgimin e çështjes në Gjykatën Kushtetuese, e cila është organi i vetëm që ka kompetencën të shqyrtojë në themel çështjen dhe të vendosë mbi papajtueshmërinë e mandatit të deputetit.
– Konstatimin si të papajtueshëm me Kushtetutën e Republikës së Shqipërisë të vendimit nr.48/2015 të Kuvendit të Shqipërisë “Për mosdërgimin në Gjykatën Kushtetuese të çështjes për konstatimin e papajtueshmërisë me detyrën e deputetit të zotit Koço Kokëdhima”.
Ky vendim është përfundimtar, i formës së prerë dhe ka fuqi prapavepruese.
