Deputeti demokrat Gazmend Bardhi ka reaguar pas vendimit të KQZ, që i dha 48 orë kohë Lulzim Bashës, për të regjistruar Partinë Demokratike në zgjedhjet lokale të 14 majit.
Në një status në “Twitter”, Bardhi thotë se nuk do të ketë asnjë plotësim dokumentacioni pasi sipas tij dokumentacioni është dorëzuar i plotë.
“PD ka dorëzuar dokumentacionin e plotë ligjor për regjistrim. Deklaratat e sotme politike të KQZ nuk kanë asnjë lidhje me ligjin, por janë formalizim i një vullneti politik ekstraligjor. Nuk do të ketë asnjë plotësim dokumentacioni sa kohë ai është dorëzuar i plotë!”-shkruan Bardhi.
Celibashi tha në mbledhjen e sotme të KQZ se dokumentacioni i dorëzuar nga grupi i Alibeaj për të regjistruar PD në zgjedhje është i paplotë.
Sipas tij, ka mangësi në lidhje me detyrimin dhe përgjegjësinë personale të kryetarit të PD që, sipas gjykatës është Lulzim Basha, për të nënshkruar deklaratën. Ai theksoi se jo çdo dokument mund të delegohet tek të tretë, ndërsa dha 48 orë kohë për të bërë plotësimet e kërkuara.
“Ka një mangësi tjetër që lidhet me detyrimin dhe përgjegjësinë personale e kryetarit të PD për të nënshkruar deklaratën. Jo çdo dokument mund të delegohet tek të tretë. Deklarata e kryetarit nuk është kompetencë, është përgjegjësi. Duke qenë përgjegjësi, është tërësisht personale. Duke e konkluduar gjithë këtë arsyetim, vlerësoj që dokumentacioni i paraqitur nga përfaqësuesi i Lulzim Bashës nuk është i plotë, ndaj do t’u jap 48 orë kohë për të bërë plotësimet e kërkuara. Domosdoshmërisht për deklaratën e kryetarit të PD”, tha kryekomisioneri Qendror i Zgjedhjeve, Ilirjan Celibashi.
