Nga një ekip kampion, në një skuadër që nuk ekziston më. Skënderbeu B është shkrirë dhe, në këtë mënyrë, nuk do të ketë mundësinë të garojë në Kategorinë e Dytë. Ekipi i dytë i klubit korçar bëri një paraqitje mbresëlënëse gjatë sezonit të kaluar në Kategorinë e Tretë dhe në fund u shpall edhe kampion duke mundur Kukësin B në finale.
Dhe, sipas rregullores, kjo skuadër do të duhej të garonte në Kategorinë e Dytë të këtij sezoni. Por, drejtuesit e klubit vendosën që të shkrijnë ekipin e drejtuar nga Vasjan Ballço. Burime të sigurta pranë klubit bardhekuq bëjnë të ditur se drejtuesit nuk kishin më interes për të mbajtur ekipin e dytë.
Ai u krijua gjatë kampionatit të kaluar për t’u dhënë më shumë hapësirë lojtarëve të rinj për të pasur mundësi federimi që më pas të përdoreshin në ndeshjet e Ligës së Europës. Këtë sezon që Skënderbeu nuk mori pjesë fare në kompeticionet europiane, drejtuesit vendosën ta shkrijnë ekipin e dytë duke mos pasur interes për të vazhduar sërish.
Ndërkaq, zyrtarë të sektorit të garave pranë FSHF-së kanë bërë të ditur se Skënderbeu B është tërhequr zyrtarisht nga pjesëmarrja në kampionat dhe, në këtë mënyrë, nuk u përfshi as në ndarjen paraprake të grupeve. /panoramasport/
