Qyteti Manaus në Brazil, katër muaj më parë ishte në qendër të vëmendjes së botës pasi u godit rëndë nga pandemia.
Pamjet ku viktimat e shkaktuara nga koronavirusi qëndronin në kamionë frigoriferikë pasi autoritetet dhe të afërmit nuk arrinin dot t’i varrosnin për shkak të numrit të madh të trupave të pajetë, pushtuan mediat botërore dhe dukej se mankthit nuk do t’i vinte fundi.
Megjithatë situata ka ndryshuar krejtësisht në këtë qytet, ku infektimet e reja me Covid-19, të shtruarit në spital dhe viktimat, kanë rënë ndjeshëm dhe situata po shkon drejt normalitetit.
Për këtë arsye, shkencëtarët janë shprehur se ky qytet mund të ketë arritur imunitetin e tufës, ndonëse izolimi nuk u vendos asnjëherë, madje edhe masat nuk është se u respektuan.
Jarbas Barbosa da Silva, një zyrtar i Organizatës Pan Amerikane të Shëndetit pohoi se piku i shpërthimit të koronavirusit ishte shumë i fortë, por sipas tij ai mund të ketë krijuar një lloj imuniteti të tufës. Megjithatë, edhe pse kjo nuk është ende e sigurt edhe pse shifrat kanë rënë, ai thekson se ky qytet ka paguar një çmim shumë të kripur. Shifrat zyrtare tregojnë se deri tani në qytetin me 1,8 milionë banorë kanë ndërruar jetë 3300 persona, afërsisht 1 në 500 persona./Opinion.al
