Uragani Dorian mbetet i stacionuar në veri të ishujve Bahamas, dhe pavarsisht se u zvogëlua në stuhi të kategorisë së katërt ai do të vazhdojë të jetë i fuqishëm përgjatë disa ditëve me erëra deri në 240 km në orë.
Kryeministri i Bahamas, Hubert Minnis, tha se uragani shkaktoi viktima, përmbytje masive, shkatërroi shtëpi dhe rrëzoi pemë e drunj shekullorë, teksa konfirmoi edhe 5 viktima në ishujt verilindor të Abakos, të cilat mbajtën edhe peshën më të madhe të stuhisë.
Sipas tij, uragani që ka goditur Atlantikun vazhdon të jetë ekstremisht i rrezikshëm, ndërsa shtoi se vendi është “në mes të një tragjedie historike”.
Dorian është uragani i dytë më i fuqishëm që regjistrohet në Atlantik dhe më i rrezikshmi që ka goditur Ishujt Bahamas që kur kanë filluar të regjistrohen të dhënat. Ai pritet të lëvizë afër bregut lindor të SHBA-së, ndërkohë që shtetet amerikane, si Florida, Xhorxhia, Karolina e Veriut dhe Karolina e Jugut, kanë shpallur tashmë gjendje të jashtëzakonshme./Opinion.al
