Me mbarimin e stinës së verës, vendet në të gjithë Evropën po shohin një ringjallje të rasteve me COVID-19 mgjithëse disa i kontrolluan me sukses shpërthimet në fillim të vitit.
Në fillim të qershorit shumë vende lehtësuan masat e izolimit dhe shumë njerëz udhëtuan për pushime në bregdet si brenda dhe jashtë vendit.
Lehtësimi i masave izoluese dhe lëvizja e njerëzve kanë kontribuar në ringjalljen e koronavirusit në disa vende në Europë.
Vendet në Evropën jug-lindore si Shqipëria, Bullgaria, Mali i Zi, Maqedonia e Veriut dhe Rumania, po shohin numra të rasteve të reja më të larta në gusht sesa në Mars dhe Prill kur ishte piku i infektimit.
Kroacia, Greqia dhe Malta duket se po përjetojnë një rritje të rasteve me numra edhe më të lartë gjatë javës së kaluar krahasuar me valën e parë.
Belgjika, Italia dhe Mbretëria e Bashkuar – ndër vendet më të goditura në Evropë – po shohin një ringjallje, por, numrat e tyre janë shumë larg atyre të muajt Marsi dhe Prill.
Megjithatë, ditën e mërkurë, Italia regjistroi shifrën më e lartë të rasteve të arritur që nga 12 maj.
Franca regjistroi 5,429 raste të reja të Mërkurën. Hera e fundit që kjo kishte ndodhur ishte në 14 Prill.
Shumë vende europiane kanë deklaruar se kthimi i turistëve nga pushimet është një nga shkaqet e rritjes së numrave të pandemisë.
Në vende të tjera si i yni dhe në rajon, heqja e bllokimit shoqëruar me mos respektimin e masave mbrojtëse ka bërë që kulmi i pandemisë të jetë gjatë muajit gusht.
Që prej 31 korrikut, Shqipëria ka regjistruar çdo ditë mbi 100 raste të reja me koronavirus. Kur u hoqën masat izoluese rekordi ditor i rasteve ishte 34 dhe në 1 qershor u konfirmuan vetëm 6 të infektuar me koronavirus.
Kancelajra gjermane Angela Merkel paralajmëroi se me ardhjen e dimrit situata parashikohet të përkeqësohet dhe shumë vende kanë nisur marrjen e masave për parandalimin e një vale të dytë e cila mesa duket në disa vende mund të ketë nisur. /Opinion.al
