Plumbat i morën jetën padrejtësisht Mario Majollarit mbrëmjen e së martës zonën e Konostudios. Gjakmarrja goditi në Tiranë! 28 vjeçari u vra pak metra larg pallatit ku banonte me nënën dhe motrën e tij, për shkak se i ati kishte kryer dy vrasje dhe per to po vuan dënimin në burg.
Motra e tij, Xh.Majollari i drejtonte fjalë zemre vëllait të vetem, afro nje vit më parë kur ai mbushi 27 vjeç. Ajo ishte e bindur që pavarësisht të gjithave, ai nuk do ta linte kurrë vetëm….
Në një postim në facebook, bërë më 16 Korrik të vitit 2017, motra e Marios shkruante:
“Ne jemi si nata me ditën, dielli me hënën, veriu me jugun, çdo gjë e kundërt që ekziston. Por të dy ndjejmë njësoj, të dy vuajmë njësoj, edhe pse kurrë nuk e themi, të dy kemi të njëjtën dëshirë, edhe pse e dimë që kurrë s’do realizohet.
Asgjë s’ka qenë kurrë e lehtë për ne të dy, por ja dolëm, sepse kemi njeri-tjetrin. Sado që më streson kur më thua sa lopë jam, apo sa këmbështrembëse jam, apo sa e shëmtuar që jam, un e di që sado e keqe të jem, ti do jesh gjithmonë mbështetja ime. E di që edhe kur të shurdhoj me talentin tim si këngëtare, edhe kur te ti vesh bluzët e tua fshehtas, edhe kur ta bej nusen tate bredharake si vetja, un do jem gjithmonë motra jote e vogël dhe ti s’do me lësh kurrë vetëm.
U bëfsh 100 vjeç gjysma shpirtit tim, Zoti me ka dhënë gjithçka tek ty…”
Autor i dyshuar i krimit të rëndë është Kastriot Gjuzi, 40-vjeç, i shpallur në kërkim policor. Gjuzi, dyshohet se ka marrë hak për vrasjen e vëllait të tij, ngjarje kjo e ndodhur 18 vite më parë. Për atë histori, babai i Marios, Avni Majollari është dënuar me burgim të përjetshëm.
