Vëllai i Admir Muratajt, Cen Murataj ka folur për mediat nga ambientet e morgut në Tiranë. Ai ka thënë se kishte dy vite që nuk kishte komunikuar me Admirin, ndërsa nuk e dinte se vëllai i tij kishte probleme kaq të rënda. Cen Murataj ka kërcënuar se nëse nuk do t’i gjejë policia, do t’i gjejë ai vetë ata që lanë në rrugë vëllain e tij.
“Admir Murataj është përdorur, ata janë vegla. Do të gjenden më vonë se nga kush. Organizator, që gjendet i vdekur, e të tjerët ikin, ai mbetet në mes të rrugës së madhe… Nuk e di për çfarë ka qenë dënuar në Greqi. Kam dy vjet që nuk kam komunikuar me të. Do t’i gjejmë ata që e kanë përdorur, po nuk i gjeti policia, do t’i gjejmë ne në mënyra të tjera. Policia ka ushtruar kontrolle edhe në shtëpi. Do t’i njohim shokët e Admirit, t’i shohim se kush janë, do interesohemi t’i gjejmë edhe ne. Do interesohemi, sepse deri tani kemi besuar se ka qenë organizatori, ta shohim tani se sa ka qenë organizator. Organizatori nuk vritet”, ka thënë për mediat vëllai i Admir Muratajt.
Policia Shqiptare dërgoi drejt Greqisë shenjat e gishtërinjve të Muratajt për ekspertizë. Mësohet se shenjat e gishtërinjve përputheshin pothuajse plotësisht, por ajo që nuk përputhej është mosha.
E gjithë ngjarja në fjalë ndodhi rreth orës 15:00 të së martës. Persona të maskuar dhe të armatosur arritën të grabisnin miliona euro gjatë kohës që po ngarkoheshin në avion.
Autorët hynë në pistën e Rinasit në kohën kur thuajse kishte përfunduar ngarkimi i thasëve me para të tre bankave të nivelit të dytë që operojnë në Shqipëri. Nën kërcënimin e armëve ata morëm thasët me para në pjesën e kargos së avionit.
Emri i Admir Murataj si personi i cili u vra gjatë kësaj grabitjeje doli fillimisht nga mediat greke. I akuzuar për një sërë veprash të rënda penale në këtë shtet, përfshirë vrasje e grabitje me armë, në 2013-n Murataj arriti të arratisej nga burgu i Trikallës së bashku me 10 të burgosur të tjerë./Opinion.al
