Vëllai i Admir Muratajt, personi që humbi jetën gjatë grabitjes së 10 milionë eurove ditën e djeshme në Rinas, ka thënë se policia ende nuk ka konfirmuar nëse bëhet fjalë për vëllanë e tij apo jo. Ai është shprehur se familja ka marrë ngushëllime, por nuk ka hapur dyert e mortit.
“Kemi disa orë që ne marrim ngushëllime, qëkur në media dolën lajmet e para, por ende nuk kemi hapur dyert e mortit. Policia nuk na konfirmon që i vrari është Admiri. Kërkoj të di nëse është vëllai im. Zyrtarisht nuk dimë gjë për vëllanë”, është shprehur vëllai i Admir Muratajt për gazetaren Klodiana Lala.
Ndërkohë në Policinë e Tiranë është shoqëruar edhe bashkëshortja e Admir Muratajt, për t’u marrë në pyetje. Duket se për të konfirmuar zyrtarisht vrasjen e Muratajt, policia pret edhe analizën e ADN-së nga Greqia, vendi fqinj ku edhe ishte dënuar e më pas arratisur nga burgu.
Admir Murataj njihet ndryshe edhe si Admir Nikaj dhe është me origjinë nga Tropoja. Ai ka qenë i burgosur në burgun e Trikallës në Greqi, prej nga është arratisur në vitin 2013. Akuzohet për grabitjen e një banke në Larisa, si edhe për dy grabitjet në rrugën e Rinasit, në dhjetor të vitit 2015 dhe në shkurt të vitit 2017./Opinion.al
