Kryebashkiaku i Tiranës, Erion Veliaj ka vlerësuar rivalët e tij në zgjedhjet lokale të 14 majit. Në një intervistë për “Report Tv” Veliaj thotë se nga 5 kundërshtarët në zgjedhje, më i forti është Roland Bejko, kandidati i PD së Alibeajt.
“Bejko përveç se është i djathtë në ideologji, shyqyr kemi një kundërshtar të djathtë, është vetët i fortë, di të organizohet, nuk është se di të intimidohet, tërhiq nga kjo, kam vite pa e takuar, por në betejën time të parë në Gjirokastër, kockë e fortë”, tha Veliaj.
Për kandidatin e koalicionit “Bashkë Fitojmë”, Belind Këlliçi, Veliaj shprehet se është trishtim që të regjistrohesh në listën e Ilir Metës, që sipas tij është njeri më i urryer apo të kandidojë për një person të shpallur non grata.
“Unë besoj që në 30 vite debate ideologjike, mund të themi që e majta ka fituar debatin ideologjik. Fakti që kemi një kandidat nga PS, LSI, një nga partia komuniste, një nga lëvizja marksiste, do të thotë që e majta e dominon, ky është një lajm i mirë. Edhe ata që hiqen si të djathtë. Kur flasin me ide të majta. E parë nga ana partiake, të regjistrohesh në listën e Ilir Metës është trishtim, të jesh sot dhe të mundohesh të bësh pudër fytyrën për Berishës që e ka të shkruar në ballë që është non grata. Amerika është acaruar kaq shumë me të, jo ata që panë tortën në sheshin Skënderbej, që humbën lekët në piramida, apo ata që mbajnë mend se si u ndërtua pa leje”, tha Veliaj.
