Kryebashkiaku i Tiranës, Erion Veliaj ka inspektuar punimet e ndërtimit të shkollës së re “Bedri Llagami” në Vaqarr.
Duke folur për investimet e bëra në kryeqytet, Veliaj tha se Bashkia do të vijojë punën për ndalimin e zaptimit të pronave publike në kryeqytet.
Krybashkiaku solli në vëmendje rastin e konvikteve në Qytetin Studenti, duke theksuar se nuk do të ketë më njerëz që zaptojnë konviktet apo hapësira të tjetra.
“Jam i vendosur ta luftoj këtë fenomen deri në fund, edhe te konviktet e Qytetit Studenti. Vërtet po mbarojnë godinat e reja aty, por nuk do ketë më rikthim të atyre që i zaptuan konviktet. Kuptohet, kanë qenë vitet e vështira në ’90, por për sa kohë ke nevojë, bashkia të jep bonus qiraje dhe gjen një shtëpi tjetër pa zaptuar konviktin. Nëse 99.99% e Tiranës ja del me mënyra ligjore të ecin përpara në jetë, me punë dhe ndershmëri, atëherë edhe 0.01% që zapton konvikte ose shkollat, do të duhet të na mirëkuptojnë dhe do të duhet të sillet si shumica. Ky qytet nuk do të bllokohet nga një pakicë e vogël”- tha Veliaj.
Veliaj kishte një thirrje për këdo që zapton hapësirat publike. Ai ka përmendur faktin se bashkia është në gjygj me një pronar i cili ka ndërtuar lokalin e tij brenda shkollës.
“Të zaptosh oborrin e shkollës ku mblidhen fëmijët është turp. Por, si çdo punë tjetër e bashkisë, ku jemi mësuar me bllokime e gjyqe nga politika, edhe këtu kemi pasur vonesa. Është mëkat që nuk e përfundojmë dot ende hyrjen e shkollës sepse jemi në gjyq me dikë që ka ndërtuar lokal brenda territorit të shkollës. Ky nuk është një vend pa zot! Nuk besoj se ka gjyqtarë që vazhdojnë të lejojnë legalizime në varreza dhe në oborr të shkollës. Thirrja për qytetarin që ka zaptuar shkollën për të bërë lokal është e thjeshtë: Largohu pa hyrë forca e ligjit! Nuk bëhet fjalë për një nevojtar apo një njeri që është pa shtëpi. Bëhet fjalë për një njeri që, për 30 e ca vite, në këtë rrumpallën e tranzicionit, fitoi para në oborr të shkollës. Çdo gjë ka një limit. Tani që shkolla bëhet e re, nuk mund të kthehemi te zakonet e vjetra”, tha Veliaj./Opinion.al
