Gjatë një takimi me të rinj, kryetari i bashkisë së Tiranës Erion Veliaj është shprehur se ka nevojë për ndihmën e tyre.
Duke kujtuar se ai i ka mbështetur të rinjtë me abonetë falas për studentët apo pagesën në 50% të kostos së konvikteve, Veliaj tha se ka nevojë tashmë për të rinjtë dhe për një fushatë pozitive.
“Sa herë që kishit një nevojë përgjigja jonë ka qenë “po”. Kur ju kishit një nevojë, kur ju kishit një ide, kur ju kishit një propozim, ne ju përgjigjëm pozitivisht. Sot kam unë nevojë për secilin prej jush, kam nevojë të më ndihmoni ta çojmë vendin përpara. Me votën tuaj, kam nevojë të më ndihmoni me njohjet tuaja, kam nevojë të më ndihmoni me shoqërinë tuaj, kam nevojë të më ndihmoni me entuziazmin tuaj dhe kam nevojë të më ndihmoni me një fushatë pozitive që e çon Tiranën vetëm përpara, që e çon skuadrën tonë vetëm parpara, që përgatit përpara syve tanë një Tiranë për një brez të ri, që i çon projektin tonë të shkollave të reja, përveç 40 shkollave edhe shkollat e “Astir” edhe të “Yzberisht” edhe të “Kashar” edhe të “Liqeni Thatë” edhe të “Sauk” deri në fund. Kam nevojë që edhe Piramidën ta bëjmë histori të jashtëzakonshme suksesi, kam nevojë për ndihmën tuaj që ne Kampusin e Universitetit të Tiranës të Qytetit Studenti ta kthejmë më të bukurin në rajon”, nënvizoi Veliaj./Opinion.al
