Nuk kishte ndodhur më parë! Kryebashkiaku i Tiranës shtyn festimet për Ditën e Verës. Lajmi bëhet i ditur nga vetë zoti Veliaj, që sipas tij në një sondazh në rrjetet sociale qytetarët kanë votuar që festimet të shtyhen në datën 17 Mars, për shkak të motit të keq.
Sipas sinoptikanëve, Dita e Verës pritet të jetë e ftohtë dhe me shi. Bashkia e Tiranës thotë se kishte parashikuar rreth 50 aktivitete festive për fëmijë e të rritur, por rreziku i një moti të keq ka bërë që kryebashkiaku Erion Veliaj të kërkojë mendimin e qytetarëve për t’i zhvendosur festimet të dielën.
Në fakt 14 Marsi, prej kohësh i “takon” qytetit të Elbasanit. Ky qytet identifikohet me këtë festë popullore, ku organizohen karnevale, panaire dhe veprimtari të ndryshme kulturore, si dhe gatimi i ballokumes, një ëmbëlsirë e veçantë në traditën kulinare shqiptare. Por siç duket vitet e fundit, më shumë këtë festë e ka përvetësuar Bashkia e Tiranës.
“Dita e Verës” ishte dita e fillimit të vitit sipas kalendarit shumë të lashtë të ilireve, pra një ditë që kremtohej shumë shekuj para se të lindte krishterimi. Ajo kremtohej me 1 mars të kalendarit Julian, ditën e parë të vitit të ri (sipas kalendarit Gregorian, “14 mars”). “Dita e Verës” ishte një festë mbarëshqiptare, që kremtohej si në Veri edhe në Jug, por me nuanca të ndryshme, sipas krahinave./Opinion.al
