Drejtuesi Politik i PS për Qarkun e Tiranës Erion Veliaj tha se duke filluar nga viti tjetër qeveria synon një rritje masive, të ndjeshme të pensioneve.
“Ne themi çfarë do të bëjmë më shumë, jo çfarë do të bëjmë më pak. Indeksimi është një detyrim ligjor i fundvitit, duke pasur parasysh inflacionin e atij viti, kurse propozimi i qeverisë është për një rritje masive, të ndjeshme në xhep, në shportë, në pagesë, të pensioneve, nga viti tjetër e tutje. Ky është një lajm i jashtëzakonshëm sepse sot e kemi mundësinë ta bëjmë këtë bisedë. Më herët nuk e kishim këtë mundësi sepse u përballëm me tërmetin dhe pandeminë. Pra, ideja është që në muajt Tetor, Nëntor, Dhjetor të marrim të gjitha propozimet, pastaj me buxhetin e rritur të shtetit, bashkia do të bëjë pjesën e saj me abonenë e pensionistit nga 1 Janari e tutje, të ofrojmë një paketë ku vërtet të ndihet një rritje e ndjeshme e pensionit.”
Kryebashkiaku Veliaj tha se ky tur do të jetë një fushatë informimi për pensionistët, por edhe një mënyrë për të marrë mendime për të përmirësuar skemën e re të pensioneve.
“Në vitin 2013 nuk e kishim luksin ta bënim këtë bisedë. Skema e pensioneve ishte në faliment, i ngjante pusetave të Tiranës, se në 2013 as Tirana s’kishte puseta. Sot nuk diskutohen pusetat, por se si Bashkia e Tiranës gjithashtu do të kontribuojë me abonenë e transportit publik falas për çdo pensionist nga 1 Janari 2025. Ndaj, ky është momenti për të bërë një bisedë, për të marrë edhe disa mendime, dhe për të përfunduar me një fushatë për të informuar njerëzit, që të bëjmë histori dhe jo histeri, për të pasur pensione shumë më të larta se ato që kemi sot, plus bonusin e bashkisë për transportin falas, plus bonusin e qeverisë për fundvitin, plus një rritje të qenësishme për pensionet. Të gjithë bashkë jemi një skuadër, nuk jemi veç e veç, dhe si skuadër kemi mundësinë të bëjmë histori.”
Veliaj theksoi se në këtë 80-vjetor të çlirimit, kjo është mënyra më e mirë për ta përfunduar këtë vit me një super reformë, që të fillojë mbarë vitin tjetër me bonusin e fundvitit, me abonenë e transportit falas dhe me një rritje të ndjeshme të pensioneve.
