Kryetari i Bashkisë Erion Veliaj ka fituar sot gjyqin përballë Presidentit Nishani. Ky i fundit e pati paditur rreth një vit më parë për shpifje. Në kulmin e debateve për parkun e lodrave tek liqeni, Veliaj pati deklaruar se gruaja e Nishanit ka grabitur tokat e kishës në Elbasan, për këtë Presidenti e çoi në gjykatë. Por sot, gjykata e pushoi çështjen, pra duke shpallur fitues në një farë mënyre Veliajn.
Ky i fundit teksa ishte në një takim me banorë të njësisë nr. 6 tha se “Ne fituam në gjykatë kundër presidentit Nishani, i cili vajti të shkatërronte lodrat e fëmijëve. Sot edhe gjykata e rrëzoi presidentin në largim. Në fakt, do isha i padrejtë nëse do të flisja sot, por unë e thashë para një viti, i thashë presidentit, mos u largo me turp, mos hyr në histori si i vetmi president që shkon shkatërron lodrat e fëmijëve, mos e mbyll me turp karrierën tënde politike, mos bëj diçka që nuk do të ta falin fëmijët e këtij qytet. Nuk më dëgjoi dhe sot edhe me vendim gjykate fitojnë fëmijët, fiton e ardhmja, fiton puna”.
Më tej Veliaj tha se “puna që ka realizuar Bashkia e Tiranës në këto dy vite tregon më së miri se kur ka vullnet edhe punët bëhen mirë dhe më shpejt”. Veliaj siguroi banorët e zonave informale se pas procesit të legalizimit këto zona do i nënshtrohen një procesi investimesh për urbanizim.
/Opinion.al
