Janë mbi 30 mijë banorë të vendosura vitet e fundit në dy lagje të reja në Yzberisht dhe Unaza e Re. Infrastruktura e mëparshme nuk ishte ndërtuar për të një numër kaq të madh banorësh ndaj ata kanë vuajtur për ujë, drita, rrugë, etj. Sot Kryetari i Bashkisë Erion Veliaj premton se problemi i ujit u zgjidh.
Një depo me kapacitet 4 mijë metra kub, si dhe rrjeti i ri i ujësjellësit janë investimi i ri UKT që bëjnë të mundur furnizimin rregullisht me ujë të Yzberishtit.
Punimet e realizuara nga UKT-ja u inspektuan sot nga kryetari i Bashkisë së Tiranës, Erion Veliaj, i cili theksoi se depoja e re e ujit në Yzberisht katërfishon prurjen e ujit në këtë zonë dhe i jep fund problemit të mbartur prej vitesh. “Falë këtij investimi zgjidhim çështjen e ujit të pijshëm për 30 mijë banorë.
Do të thotë se në këtë zonë do ulet numri i boteve të ujit, por gjithashtu nga Yzberishti deri në “Misto Mame” do të kemi gjithmonë e më pak probleme për çështjen e ujit të pijshëm”, tha kryebashkiaku Veliaj.
Kryetari i Bashkisë së Tiranës falenderoi qytetarët, të cilët kanë paguar rregullisht faturat e ujit, duke bërë të mundur një gjendje më të mirë financiare të UKT-së, çka sjell edhe më shumë investime në rrjetin e ujësjellësit.
