Ditën e sotme kryetari i Partisë Socialiste të Tiranës, Erion Veliaj dhe Sekretari Organizativ i PS, Blendi Klosi, zhvilluan një takim organizues me drejtuesit e rinj të PS-së në kryeqytet, për të diskutuar mbi zgjedhjet e ardhshme lokale të vitit 2023.
Veliaj theksoi se tashmë është koha që PS të nis përgatitjet për zgjedhjet lokale edhe pse duhen më shumë se 200 ditë nga mbajtja e tyre.
Duke vlerësuar punën e tij dhe qeverisë, Veliaj ironizoi dhe opozitën, për të cilën tha se nuk do të mund të kishte përballuar situatën e krijuar nga tërmeti apo pandemia.
“Ecejaket e vendit tonë kanë qenë pak si Kalaja e Rozafës: PS ndërton, vijnë ata [opozita] natën shkatërrojnë; lind dita prapë, PS-ja ndërton, vijnë këta të tjerët [opozita] e çojnë prapa. Mesa duket, kur janë ndarë rolet në politikë, PS-së i ka rënë roli i ndërtimit dhe i progresit, kurse atyre u ka rënë një rol jo aq i lavdishëm. Por, ne jemi këtu të bëjmë llogaritë tona. Fakti që ne, si PS, jemi të aftë të ndryshojmë veten, japim garanci që e ndryshojmë edhe vendin. Këtë do të vazhdojmë të bëjmë edhe në Bashkinë e Tiranës, edhe në Qarkun e Tiranës. Imagjinoni sikur të kishte ndodhur tërmeti në kohën e gjumit në Bashkinë e Tiranës. Jo tërmet, po këtu nuk punonte as Sahati. E gjetëm Bashkinë e Tiranës mbuluar me graffiti, tre metra nga zyra e kryetarit të Bashkisë. Imagjinoni të kishte rënë pandemia në kohën e Nard Nokës. Se vërtet themi ishte sfidë kur erdhën vaksinat, sa shpejt erdhën respiratorët, me gjithë përpjekjet titanike të Edit dhe qeverisë sonë për t’ia dalë me tërmetin dhe me vaksinat. Por imagjinoni sikur këto taksirate të kishin rënë në atë kohë”, nënvizoi Veliaj.
Ai theksoi se të gjithë e mbajnë mend kur opozita e sotme, atëherë në pushtet, nuk menaxhonte dot as digat, as energjinë, e cila vidhej, kurse njerëzit përmbyteshin e nuk kompensoheshin.
“Energjia vidhej masivisht, uji derdhej, njerëzit përmbyteshin. Pas 10 vitesh, u desh të vinim ne në qeveri që të bënim kompensimin e atyre që humbën shtëpitë dhe katandinë nga përmbytjet e asaj kohe. Prandaj, së pari, ne duhet të jemi të përulur. Kemi bërë shumë punë, duhet të jemi krenarë, por jo arrogantë. Super krenar për shkollat që kemi ndërtuar, kemi bërë më shumë shkolla që nga koha e Pavarësisë”, tha Veliaj.
