Humbja në derbi ndaj Partizanit hapi “folenë e grerëzave” te Tirana,ose më saktë te tifozët VIP të klubit bardheblu.
Ditët e fundit këshilltarët e Lëvizjes Socialiste për Integrim i kanë dërguar një letër Bashkisë së Tiranës, ku i kërkonin më shumë vëmendje kryebashkiakut Erion Veliaj kundrejt klubit bardheblu me arsyetimin se edhe Bashkia është aksionare e klubit, por po jep shuma mjaft të vogla, që nuk mjaftojnë për ndërtimin e një klubi modern dhe skuadre cilësore.
Megjithatë, sot në mëngjes Veliaj ka qenë i ftuar në emisionin e News24, “Koha për t’u zgjuar”, ku ka prekur tema të ndryshme dhe nuk ka munguar edhe komenti i tij për debatin në lidhje me klubin e futbollit Tirana.
“Ne kemi 34% të aksioneve, pra jemi aksionar minorance, ndërsa në sport klub “Tirana” vendimet i merr shumica, sipas rregullave i kemi kërkuar aksionarit të shumicës së pari të bëjë një mbledhje aksionarësh, sepse asambleja mblidhet për të marrë vendime. I kam kërkuar zotit Refik Halili si aksionar shumice të mbledhë asamblenë, të na sjellë disa dokumente.
“Kur dëgjoj gjëra të natyrës: ‘Na duhen 130 mijë euro për një lojtar që ka luajtur vetëm 7 minuta në Shqipëri’, sigurisht që paratë e taksapaguesve të Tiranës, unë nuk i administroj shkel e shko. 130 mijë euro për 7 minuta, besoj as Ronaldo nuk kërkon!
Ajo që kam kërkuar e premtuar si kryetar Bashkie është të
ndihmojmë të gjitha ekipet”, tha Veliaj.
