Kryebashkiaku i Tiranës Erion Veliaj tha sot se do të ridizenjojmë hartën administrative të Tiranës.
Duke folur tek njësia nr.6 në Kombinat ku përkrah kishte edhe Saimir Tahirin, Veliaj tha se “një nga propozimet e para do të jetë që zona e Astirit do të trajtohet si pjesë e njësisë bashkiake nr. 6”. Sipas tij, kjo bëhet për të lehtësuar jetesën për mijëra familje.
“Propozimi ynë i parë është që e gjithë zona e Astirit, siç realisht po i merr shërbimet në Kombinat, edhe në kufijtë administrativë të trajtohet nga njësia nr. 6. Tani që mbushet ky afat dhe na jep mundësinë ligjore, do t’i çojmë Parlamentit të ri dhe qeverisë së re të gjitha propozimet tona për ridizenjimin e hartës administrative të Tiranës, që realisht njerëzit t’i marrin shërbimet aty ku jetojnë, ku kanë shkollat, ku kanë çerdhet dhe kopshtet”, theksoi Veliaj.
Më tej ai dha lajmin se më 20 Qershor do të hapet Bulevardi i Ri të Tiranës ndërsa bëri thirrje të votohet Edi Rama më 25 Qershor.
