Në ditën e Kurban Bajramit nuk kanë munguar as urimet e figurave të rëndësishme politike shqiptare. Pas kryeministrit Rama dhe kryetarit të Opozitës Lulzim Basha, urojnë nga Komuniteti Mysliman Shqiptar edhe kryetarja e LSI, Monika Kryemadhi dhe kryebashkiaku Veliaj.
“Për gjithë besimtarët mysliman dhe për gjithë shqiptarët në fakt në këtë ditë të sakrificës dhe të flijimit të ditës së Kurban Bajramit dua tu uroj paqe, begati, mirësi dhe të ndajmë mirësinë me njëri-tjetrin, të ndajmë begatinë me njëri-tjetrin dhe të largojmë urrejtjen dhe dëshpërimin nga njëri-tjetri.
Sot në këtë ditë të shënuar, e cila në njëfarë mënyre na kujton të gjithëve të reflektojmë, që jemi të barabartë përpara Zotit, le të jemi përsëri vëllezër me njëri tjetrin, të jemi përsëri të angazhuar me njëri-tjetrin për të bërë mirë për Shqipërinë dhe shqiptarët kudo që janë,” tha Kryemadhi.
Por të njëjtin urim për bashkim e ka bërë edhe Veliaj:
“Nuk jam naiv, e di që mrekullitë mezi ndodhin. E di që me tu kthyer shtatori, me gjasë do të rikthehet sherri, do të rikthehet debati, konflikti. Por ndoshta dita e sotme, është një ditë për të reflektuar pak, si do të kthehemi në shtator në Tiranë.
Do kthehemi për të përçarë apo do të kthehemi për të bashkuar, do kthehemi për të lënduar njëri-tjetrin apo për të shëruar njëri-tjetrin, do kthehemi për ti vendosur njëri-tjetrit stërkëmbëshin, apo për ti dhënë njëri-tjetrit dorën?”
Mos ndoshta nuk është vetëm një urim, por ftesë për bashkëpunim nga ana e të dyve?/Opinion.al
