Gjatë një takimi në Njësinë 11, Kryebashkiaku Veliaj ka sulmuar të dy drejtuesit e partive opozitare Meta dhe Berisha.
Ndërsa kreun e partisë së Lirisë e ka cilësuar një fuks, për Berishën tha se po kandidon Këlliçin me qëllimin për t’i hapur vendin në parlament Aldo Bumçit.
Gjithshtu gjatë takimit, Veliaj taj se investimet e parashikuara në Tiranë, përfshirë edhe unazën e madhe do të bëhen, sepse qyteti ka nevojë.
“Autostrada do të bëhet sepse Tirana ka nevojë për Unazë. Aty ku ka kaluar Unaza e Madhe, ka sjellë zhvillim të pronës. Aty ku është rritur vlera e pronës, njerëzit janë bërë më të pasur. Aty ku ka kaluar autostrada, ka më shumë tregti, biznes, janë krijuar institucionet. Ndaj, për këdo që e prek gjurma e autostradës, kush i ka letrat, do t’i marrë lekët një më një në dorë. Kush nuk i ka letrat, do marrë aq metra katrorë sa ka sot për shtëpinë e tij, siç po bëjmë te “5 Maji”, deklaroi Veliaj.
Ai tha se njerëzit nuk duhet të dëgjojnë as Sali Berishën, as Ilir Metën sepse ata i përdorin mish për top.
“Kush ka besim te shteti, te qeveria, te bashkia, ka marrë shtëpinë. Kush rri me gishtat përpjetë, me barrikada… Ata janë të njëjtët: shkonin te “Astiri” të veshur me kollare, flokët me këna, të hekurosur, dhe thoshin: “Ne këtu do shtrihemi”. Mbaroi “Astiri”! Thanë: “Ne do shtrihemi te Shqiponja”. Mbaroi “Shqiponja”! Këta i kanë njerëzit mish për top, i përdorin njerëzit vetëm për të kapur lajmet, vetëm për të kapur titrat. Mendoni se Ilir Meta dhe Sali Berisha qajnë hallin e njerëzve? Ata janë persona “non grata”, ata nuk shkojnë dot deri në Rinas, nuk kanë autoritet deri në Rinas. Vijnë në Tiranë nga Lalzi, çohen në mëngjes në vilat e tyre në Lalz, vjen shërbëtorja u sjell kafen, e pijnë dhe vijnë në Tiranë që të hapin sherr”, u shpreh ai.
Veliaj tha se Berisha e ka kandiduar në Tiranë një deputet, që ta nxjerrë nga lista dhe kështu të fusë në Parlament Aldo Bumçin. “Saliu “non grata” ka vënë një kandidat aty, se do që t’i lirohet mandati për Aldo Bumçin. Nuk ka besim te ky kaçarrumi që ka vënë dhe do që të futet Aldo, që t’i marrë mandatin atij. Ilir Meta, si fuks i vjetër i sigurimit, është akoma më i zgjuar, ai thotë: “Bashkinë e di që e humbasim, s’kam për t’u futur fare në bashki, do kandidoj vetëm për Këshill Bashkiak”, se thotë Këshilli Bashkiak është më i rëndësishëm. Këta janë dy të mbaruar që sa herë e kanë kapur këtë qytet me dorë, e kanë bërë copë e çikë. Kur janë në opozitë vetëm kanë bllokuar gjithçka”, e mbylli Veliaj fjalën e tij.
