Kryetari i Bashkisë së Tiranës, Erion Veliaj ka deklaruar sot se detyrimet e bizneseve do të shtyhen deri në qershor.
Në një intervistë për A2CNN, Veliaj bëri me dije se vendimi do të merret në mbledhjen e sotme të Këshillit Bashkiak, për shkak të situatës së krijuar nga koronavirusi në vend.
“Një nga vendimet e para që do të marrë Këshilli Bashkiak në mbledhjen virtuale do të jetë shtyrja e afatit për të gjitha detyrimet nga bizneset deri në qershor. Unë jam kundër atyre politikanëve populistë që vendimet merren çdo ditë. Ne nuk mund të marrim vendime ditore. Ne kemi pasur vetëm një ditë humbje pune, që ishte e premtja. Më pas do të konsultohemi me qeverinë, sa të zgjasë kriza, në të njëjtën masë do të jetë ndihma”, u shpreh Veliaj.
Ai rikujtoi edhe njëherë numrin e gjelbër për të gjithë ata që janë në pamundësi të sigurojnë kushtet e nevojshme në këtë kohë të vështirë.
“Është absolutisht e nevojshme të kujdesemi për më të dobëtit. Ne jemi në kontakt me të gjithë institucionet dhe ata janë pjesë e listave tona. Numri ynë i gjelbër 0800 888 është në dispozicion. Të gjithë duhet të bëjnë detyrën e qytetarit dhe duhet të na sinjalizojë për rastet që kanë nevojë”, deklaroi Veliaj. /Opinion.al
