Aktorja dhe aktivistja, Kaltrina Zeneli, e cila publikoi videon e dhunës së infermieres Aurona Pelaj ndaj të moshuarës në azilin në Pejë është kërcënuar me jetë.
Zeneli ka deklaruar se një ndër mesazhet që i kishte mbërritur, shkruante: “Veç mos të pafsha në rrugë se kam me t’mbyt”.
“Veç mos të pafsha në rrugë se kam me t’mbyt ka qenë njëri ndër mesazhet kërcënuese”, tha Zeneli në një emision në KTV.
“Përveç meje, mesazhe kërcënuese kanë marrë edhe profilet e tjera që kanë të njëjtin emër. Po dua me ia bë të ditur të gjithëve se nuk kam qenë unë ajo që ka incizuar. Kush ka ndonjë problem të më shkruajë mua”, shtoi aktorja Zeneli.
“Unë punoj në Artpolis, një organizatë feministe dhe reagojmë për raste të ndryshme kur ka dhunë familjare. Gjatë kohës që kam qenë me kolegët pak para provave, më ka shkrujt dikush dhe ka kërkuar me dit qysh me raportu një dhunë. I thashë thirre Policinë, ata të drejtojnë ku duhesh me shku. Më tha, a mundesh me ma gjet një numër që merret këto raste dhe po më tregon që është ushtru dhunë ndaj një të moshuare. Unë prapë i thashë thirre Policinë. E vazhdova ditën. Pas dy-tre ore, e pyeta a ka marrë një iniciativë. Më tha që ishte duke pritur për të shkuar në Polici. Por aty ma ka dërgu videon. Pasi e kam pa, nuk mujta me prit më dhe e kam postuar menjëherë. Nuk kam mundur ta shoh videon deri në fund. Jam shtangur, nuk kam dit me reagu. E kam qit nënën time në vend të saj. Nuk e di… s’po gjej fjalë të përshkruaj”, u shpreh aktorja.
E moshuara është e ëma e Taulant Nurës, i cili ka rënë dëshmor në luftën për çlirimin e Kosovës.
Të afërmit e kanë nxjerrë gruan e moshuar menjëherë nga azili privat pas publikimit të videos.
