Një postim në llogarinë e zëvendëskryeministrit Braçe në “Instagram” mbi situatën aktuale në futbollin shqiptar, nxiti disa replika në distancë mes tij dhe futbollistit Andi Lila.
Duke iu referuar lajmeve të ditëve të fundit për situatën financiare të klubeve dhe akuzave për trukime të skuadrave në vendin tonë, Braçe shkroi se këto janë bilance mizerabël, të pistë e jo transparentë, ndërsa e quajti garën e paracaktuar në funksion të përfitimeve nga bastet ndërkombëtare.
Pas këtij postimi, ka ardhur edhe një reagim nga futbollisti i kombëtares, Andi Lila. Në cilësinë e Kryetarit të Sindikatës së Futbollistëve Profesionistë Shqiptarë, ai i drejtohet Braçes duke i thënë se politika në vend i ka pasur të gjitha mundësitë të përmirësonte statusin e futbollistëve, teksa ka ngritur edhe disa pyetje të tilla si:
“A nuk ka qenë detyrë e administratës tatimore që të kontrollojë klubet e futbollit jo vetëm për bilancet mizerabël, por edhe për pagimin e kontributeve shoqërore e shëndetësore për futbollistët? Përse z.Braçe, politika kujtohet për futbollin vetëm kur shkojmë në Europian apo fushata elektorale ku premtimet asnjëherë nuk mbahen. A e dini se të humburit e përhershëm nga mungesa e vullnetit politik janë FUTBOLLISTET. Është pikërisht mungesa e vullnetit politik që te futbolli profesionist të ketë përmirësime thelbësore që na bëri ne si futbollistë që të angazhoheshim në themelimin e Sindikatës ton”.
Braçe reagoi sërish, se nuk do të replikonte kurrë me një futbollist, por meqënëse Lila u prezantua si kryetar i Sindikatës së Futbollistëve Profesionistë Shqiptarë, do të ndajë me të disa mendime. Zv.ministri i thotë Lilës se askush nuk mund ti thotë sesi të flasë, teksa shton se nuk paragjykon askën por iu referohet fakteve./Opinion.al
