Në fshatin Vreshtas të Korçës është vrarë Besnik Bazelli. Policia thotë se viktima u përfshi në një sherr të dhunshëm me fqinjin dhe vdiq rrugës për në spital.
Viktima dhe autori janë konfliktuar për motive banale në qendër të fshatit Vreshtas dhe më pas sherri ka vijuar edhe me përplasje fizike. Autori, K. Lika, 28 vjeç është ndaluar nga autoritetet policore.
Njoftimi i policise së Korçës
Më datë 06.10.2016 njoftohemi se në urgjencën e Spitalit Rajonal të Korçës, ka mbërritur trupi i pajetë i shtetasit B.M, rreth 44 vjeç, banues në fshatin Vreshtas.
Nga të dhënat paraprake dyshohet se ky shtetas në qendër të fshatit Vreshtas, është konfliktuar fizikisht për motive të dobëta me bashkëfshatarin e tij shtetasin K. Lika, 28 vjeç, ku si pasojë e dëmtimeve trupore të marra, shtetasi B.M gjatë rrugës për në Spital, ka ndërruar jetë.
Autori i dyshuar i ngjarjes ndodhet i shoqëruar nga shërbimet e Policisë.
Grupi hetimor po punon për zbardhjen e plotë të rrethanave të ngjarjes.
