Aktivisti i Vetëvendosjes Astrit Dehari ka ndërruar jetë në burgun e Prizrenit, raporton Klan Kosova. Akoma nuk dihen rrethanat se si ka ndërruar jetë Dehari, pasi këtë akoma nuk e kanë bërë të ditur as institucionet përkatëse dhe as Lëvizja Vetëvendosje.
Ndërsa dje deputetët dhe aktivistët të Lëvizjes Vetëvendosjes shkuan nga Prishtina në Prizren, për të kërkuar lirimin e Astrit Deharit, i cili akuzohej për terrorizëm.
Njoftimi zyrtar
Shërbimi Korrektues i Kosovës ka bërë me dije se sot, më 5.11.2016, në rrethana ende të pasqaruara, i paraburgosuri A.D., ndërroi jetë në Spitalin Rajonal të Prizrenit.
“Shërbimi Korrektues i Kosovës, shpreh keqardhje të thellë për rastin tragjik të ndodhur sot në Qendrën e Paraburgimit në Prizren. Shërbimi Korrektues i Kosovës, në bashkëpunim me institucionet tjera përgjegjëse, së shpejti do të japin raport për rrethanat dhe detajet e këtij akti tragjik”, thuhet në njoftimin për media të SHKK-së.
SHKK thotë se i pandehuri A.D. ishte në paraburgim për shkak të dyshimit të bazuar se ka kryer veprën penale nga neni 136, par. 1, lidhur me nenin 135, par. 1, nënpar. 1.7 të KPRK-së dhe dyshim i bazuar për veprën penale neni 374 par. 1 të KPRK.
