Kryebashkiaku i Bashkisë së Himarës, Jorgo Goro reagon një ditë pas ngjarjes së trishtë në këtë qytet, ku turisti rus humbi jetën pasi u godit nga një skaf teksa lahej në det.
Teksa nënvizon se ngjarja ka qenë aksidentale, Goro sqaron se “ky aksident nuk ka ndodhur brenda zonave të kontrolluara nga bashkia”, duke i dhënë përgjigje kështu akuzave të bëra një ditë më parë nga Policia e Shtetit, e cila tha dje se Bashkisë së Himarës i ishin dërguar 6 shkresa për të respektuar rregullat dhe garantuar siguri për pushuesit./panorama
Goro thekson se siguria e pushuesve është prioritare për Bashkinë e Himarës, duke shtuar se janë përcaktuar vendet ku duhet të hyjnë mjetet ujore.
“Ngjarja në Himarë është aksidentale. Nuk ndodhi brenda zonave të kontrolluara nga bashkia. Na vjen keq për turistin që humbi jetën. Për ne është me rëndësi jeta e pushuesit, dhe kemi marrë masa për sigurinë. Ngjarja ka ndodhur në zonën shkëmbore, jashtë plazhit të kontrolluar. Ne kemi përcaktuar vendet ku duhet të hyjnë mjetet ujore. Nuk ka ardhur asnjë ankesë për hyrje të skafeve në zona të kontrolluara”, shprehet Goro.
