Policia e Shtetit ka reaguar ashpër ndaj njësive të Qeverisjes Vendore sepse sipas saj organet përgjegjëse nuk kanë marrë masa dhe nuk kanë krijuar kushtet e nevojshme qoftë edhe në një plazh të vetëm, për sigurinë e pushuesve. Në deklaratën zyrtare të Policisë, thuhet se megjithë komunikimin e vazhdueshëm shkresor të kryer nga ana e Policisë së Shtetit me njësitë e qeverisjes vendore, këto të fundit nuk kanë marrë asnjë masë për të krijuar kushtet e sigurisë.
Nisur nga ngjarja e rëndë që ndodhi sot, ku humbi jetën një pushues në zonën e Himarës, Policia e Shtetit informon se Bashkisë Himarë i janë dërguar 6 shkresa zyrtare për plotësimin e detyrimeve që rrjedhin nga një vendim i Këshillit të Ministrave me nr. 321. *** Detyrimet e pazbatuara nga këto Njësi vendore janë: · identifikimi i zonave të përshtatshme si zona çlodhëse të konsideruara të sigurta dhe të shëndetshme; · dhënia e autorizimit për plazhe; · dhënia e lejeve dhe autorizimeve për përdorim publik, sporte ujore; · heqja e lejeve në rast se përdoruesit nuk përmbushin kushtet; · vënia e gjobave për përdorimin jashtë kritereve të mjeteve lundruese dhe të kushteve higjeno–sanitare.
Sipas këtyre detyrime që burojnë nga aktet ligjore, qeverisja vendore në bashkëpunim me Drejtorinë e Përgjithshme Detare përcakton:
· zonat e përdorimit të mjeteve lundruese argëtuese, të cilat të jenë të shënuara në mënyrë të dukshme me shënues të veçantë, ku të tregohen dhe korridoret e hyrjes e daljes nga uji; · distancat e ushtrimit të aktivitetit të lundrimit nga këto mjete; · oraret e përdorimit të tyre; · vendosjen në vende të dukshme të shenjave sinjalizuese si: “Kujdes – zonë ku ndalohet përdorimi i mjeteve lundruese”, “Kujdes – zonë e ndaluar për të notuar”. Çdo zonë e deklaruar për plazh duhet të ketë: · kulla vrojtimi për çdo 250 – 300 m, me lartësi 3 metra dhe çdo kullë të ketë vrojtues të trajnuar; · mjete sinjalizimi dhe komunikimi; · flamuj, postera për vendet e lejuara për lundrim e argëtim, për pushues.
