Presidenti Iranian, Ebrahim Raisi, mbështetës i linjës së ashpër dhe i konsideruar si pasues i mundshëm i liderit suprem, Ajatollahut Ali Khamenei u vra në një aksident ajror në moshën 63 vjeçare.
Helikopteri me të cilin po udhëtonte, së bashku me 8 persona të tjerë përfshirë edhe ministrin e jashtëm Hosein Amirabdollahian u rrëzua në një zonë të thellë malore, pranë kufirit me Azerbajxhanin.
Një operacion i vështirë kërkimi u zhvillua përgjatë natës, pas njoftimit se mjeti fluturues kishte bërë ulje të vrazhdë, si u tha, mes mjegullës së dendur. Helikopteri, një prodhim amerikan, BELL 212, u zbulua në orët e para të së hënës kur edhe u konfirmua vdekja e presidentit dhe të gjithë pasagjerëve të tjerë.
U lokalizuan po ashtu edhe trupat të cilat u transportuan drejt qytetit të Tabriz. Ajatollahu Khamenei, shpalli 5 ditë zije kombëtare ndërsa të gjitha aktivitetet kulturore dhe artistike do të pezullohen për 7 ditë.
“Në emër të Zotit. Vijmë prej tij, dhe tek Ai do të kthehemi… Me hidhërim të thellë mora lajmin e hidhur për martirizimin e presidentit popullor dhe shoqëruesve të tij të shtrenjtë. Ai ishte njeri fisnik që si para ashtu edhe gjatë presidencës së shkurtër, nuk rreshti së përpjekuri në mbrojtje të popullit të tij, vendit dhe Islamit”, u shpreh Khamenei.
Lideri suprem Ajatollahu Ali Khamenei, i cili ka pushtetin kryesor, u përpoq më herët të siguronte iranianët se nuk do të kishte ndërprerje të punëve shtetërore. Ai u kërkoi qytetarëve të luten për presidentin, dhe të gjitha televizionet në vend ndalën programin e rregullt për të shfaqur lutjet që po mbaheshin rreth vendit.
Sipas ligjit Iranian, zëvendës presidenti Mohammad Mokhber do të marrë pushtetin pas vdekjes së presidentit. Më pas një këshill i përbërë nga kryetari i parlamentit, kreu i gjyqësorit dhe zëvendës presidenti duhet të organizojnë zgjedhjet për presidentin e ri, brenda 50 ditëve.
Ali Bagheri Kani, i cili drejtonte delegacionet iraniane në bisedimet me SHBA për çështjet bërthamore u emërua ministër i jashtëm në detyrë, saka zëvendës presidenti që merr detyrat Raisit, thirri një takim të jashtëzakonshëm të kabinetit gjatë së hënës.
