Vetëm pak minuta pasi miqtë njoftuan në rrjet vdekjen e përgjegjësit të qarkullimit rrugor në Shkodër, është ish- deputeti demokrat Bardh Spahia, ai që përmes një mesazhi denoncon mungesën e testeve për punonjësit e uniformave blu.
Në një postim në rrjetin social Facebook, Spahia publikon një mesazh të mbërritur tek ai, nga një efektiv i policisë së Shkodrës, që bën me dije se në këtë qytet janë të paktën 20 punonjës policie të prekur nga Covid, të cilët sipas tij nuk testohen për mungesë tamponësh.
“Mungese tamponësh edhe për uniformat blu në Shkodër. Qytetaret në mëshirë të fatit! Denoncimi paraqet situatën skandaloze që e kemi denoncuar edhe me parë në Shkodër, tamponet me racion ose mungesën e tyre. Një punonjes i qarkullimit rrugor humbi jetën dhe kolegëve të tij nuk u bëhet testi! Ngushëllime familjes dhe shërim të shpejtë punonjësve të tjerë të rendit. As për kategoritë e linjës së parë nuk pyetet si personel shëndetësor e uniformat blu?”, shkruan Spahia.
Më tej, ish-deputeti i drejtohet Kryeministri dhe MInistres së Shëndetësisë, ndërsa thotë se dështimi I tyre po kushton jetë.
“Zoti kryeministër e zonja ministre e shendetësisë, si mund të qëndroni akoma në detyrë e kaq indiferente? A e shikoni se dështimi juaj po kushton jete, ndërsa dukshëm nuk ka as përgatitje e as masa për të shmangur këtë kolaps! Zoti ministër i rendit! Janë punonjesit tuaj këta qe po vdesin e janë lënë në mëshire të fatit në Shkodër!! Si mund të heshtni kështu? Cfarë soji jeni që keni kurajon qe heshtni me nje situate te tille?”, shkruan Spahia./Opinion.al
