Kryeministri, Edi Rama, ka reaguar për ndarjen nga jeta të ish-Sekretarit Amerikan të Shtetit Henry Kissinger.
Përmes një postimi në rrjetet sociale, Rama teksa shkruan se Kissinger ka lënë pas një pasuri të madhe siç janë librat e tij, thotë se personalisht do t’i jetë mirënjohës për kohën që Kissinger i ka kushtuar, duke i dhuruar “një ndër bisedat më të bukura.”
“Lamtumirë Bos! Librat Tuaj i mbeten njerëzimit si pasuria e paçmueshme e një eksperience dhe urtësie të rrallë, e do të jenë në dispozicion të kujtdo sot e gjithmonë, që do të dojë të aftësohet mbi marrëdhëniet ndërkombëtare dhe gjeopolitikën; balancat mes fuqive dhe realizmin politik në ruajtjen e paqes e në projektimin e rrugëdaljeve nga konfliktet ndërshtetërore; të menduarit strategjik dhe perspektivën afatgjatë të politikës së jashtme; rolin e shkencës joekzakte të historisë dhe rëndësinë e talentit të individit kur duhen marrë vendime përballë mjegullës së të nesërmes… Mua personalisht do të më mbetet edhe mirënjohja për kohën e çmuar që më kushtuat bujarisht, duke më dhuruar një ndër bisedat më të bukura që mbaj mend.U prehshi në paqe Dr.Kissinger”, shkruan kreu i qeverisë.
