Gjykatësi malazez që ka në ngarkim çështjen e vrasjes së vëllait të Kim Jong-Un së fundmi ka thënë se nuk e përjashton si mundësi që vrasja të ketë ndodhur për arsye politike, megjithatë nuk ka prova të mjaftueshme për të vërtetuar se sulmi është organizuar nga ndonjë qeveri.
Kim Jong-Nam u vra në aeroportin ndërkombëtar të Kuala Lumpur-it, ndërsa po bëhej gati të hynte në avion në shkurt të vitit 2017.
Gjykatësi doli në këtë konkluzion edhe pse vrasja e tij u krye duke përdorur substanca të ndaluara helmuese.
Megjithatë, dy femrat e ndaluara për këtë krim, – të cilat shprehen se janë futur në kurth, – do të vazhdojnë të përballen me gjyqin. Nëse shpallen fajtore, i pret dënimi me vdekje.
Dy gratë hynë në gjykatë mëngjesin e sotëm të shoqëruar nga forca të shumta policie. Të akuzuarat, të cilat prokurorët thonë se janë vrasëse të mirë stërvitura me pagesë, dukeshin të shokuara dhe qanin, raporton Channel News Asia. Më parë ato kanë deklaruar se mendonin që po merrnin pjesë në një “kurth” të ndonjë emisioni televiziv humoristik.
Në muajin mars, qeveria e Shteteve të Bashkuara deklaroi se në vrasjen e Kim Jong-Nam ka gisht vetë qeveria koreano-veriore. Kim Jong-Nam më parë ka kritikuar sundimin e familjes së tij në Korenë e Veriut dhe sipas zyrtarëve të Koresë së Jugut, Lideri Kim Jong-Un kishte urdhëruar ekzekutimin e gjysëm vëllait të tij.
Seanca e rradhës ndërkohë është caktuar në muajin nëntor./Opinion.al
