Ish-kryeministri Sali Berisha, ka reaguar pas vdekjes së 27-vjeçarit Jani Rustemi, që u arrestua për vjedhjen e një tapeti dhe një palë atleteve.
Nëpërmjet një postimi në rrjetet sociale, Berisha e konsideron vdekjen e Rustemit vrasjen shtetërore të radhës. Pasi i shpreh ngushëllime familjes, ai i bëri thirrje Avokatit të Popullit që të hetojë këtë rast.
“Një krim tjetër horror shtetëror! I riu, Jani Rustemi i ndaluar nga policia, u dërgua në gjendje kome pas keqtrajtimit shtazarak nga kriminelët me uniformë dhe vdiq dje në QSUT. Ai mbahej në paraburgim me akuzën se kishte marrë pa leje një qilim. Familjarët dëshmojnë se në paraburgim ndaj Janit është ushtruar dhunë e egër nga banditë me uniformë. Kjo është vrasja shtetërore e radhës nga kriminelë me uniformën e një qytetari të ndaluar nga policia. I shpreh ngushëllimet e mia familjes së të ndjerit dhe dënoj me ashpërsinë më të madhe si vrasje të mirëfilltë shtetërore të Jani Rustemit. I bëj thirrje Avokatit të Popullit të hetojë me përparësi dhe denoncoj publikisht këtë akt kriminal të banditëve me uniformë. I bëj thirrje Komitetit të Antitorturës të Këshillit të Europës të ndërmarrë hetime për vrasjen me tortura të Jani Rustemit dhe shumë të rinjve të tje nga xhelatë me uniformë në burgjet dhe paraburgimet e narkoshtetit të Shqipërisë”, shkruan Berisha.
Rustemi u arrestua më 13 Prill, por pasi shfaqi probleme shëndetësore u dërgua në spital dhe qëndroi 1 muaj në gjendje kome.
Mjekët, pasi konstatuan se në kartelën mjekësore i riu ishte përdorues i lëndëve narkotike, i dhanë metadon për të stabilizuar situatën e tij. Por pas këtij mjekimi, ai ra në gjendje kome, ndërsa ishte nëna e tij që akuzoi bluzat e bardha për mjekim të gabuar.
Për rastin është ngritur edhe një hetim për të zbuluar se cilat ishin shkaqet e përkeqësimit të gjendjes së të riut.
