Avokatja e Popullit, Erinda Ballanca ka qenë e ftuar dje në Tv Fax News ku ndër të tjera është pyetur edhe për vdekjen e të riut në ambientet e komisariatit të Korçës. Ballanca ka deklaruar se ambienti ku ndodhej Enea Ftoi nuk mund të kishte kamera sepse është në shkelje të privatësisë.
“Ai është një komisariat që ne e kemi trajtuar në 2017 dhe pas problematikave që kanë dalë ka pasur përmirësime. Ka qenë rekomandim i Avokatit të Popullit që kamerat të vendosen por jo të gjitha ambientet vëzhgohen, një pjesë lidhen me mungesën e finaniciare për vendosjen e kamerave, por në disa raste kamerat janë të cilësisë së dobët. Aty ku ka qenë i ndjeri nuk ka një vend të ndarë për nevojat personale dhe nuk mund të vendosësh aty kamera”, u shpreh ajo.
Pra Ballanca nuk e gjen problemin tek mungesa e kamerave, por diku tjetër. “Në rastin konkret problem është dhënia e ndihmës. Është evidentuar si një person që kishte probleme shëndetësore se ishte përdorues droge, ne kemi kërkuar që drejtoria të ketë personel që tu vijë në ndihmë, nuk preferojnë mjekët për të shkuar. Nuk ka dalë ende shkaku i vdekjes, nuk kemi asnjë kompetencë për të përcaktuar shkakun e vdekjes. Në rastin konkret në këtë drejtori ka vetëm infermier, që i ka injektuar qetësues se i ndjeri i është ankuar se kishte dhimbje”, deklaroi ndër të tjera Ballanca.
