Zëdhënësja e NATO-s, Oana Lungescu ka reaguar në lidhje me vdekjen e dy ushtarakëve shqiptarë, nëntetare Zarife Hasanaj dhe major Klodian Tanushi.
Hasanaj dhe Tanushi mbetën të vdekur pas shpërthimit të një mine gjatë një misioni të NATO-s në Letoni.
Ndërkohë, Lungescu është shprehur për “News24”, se janë të shokuar për vdekjen e tyre, ndërsa thekson mbështetjen dhe bashkëpunimin e NATO-s me Shqipërinë.
Zëdhënësja e NATO-s, Oana Lungescu shkruan:
Jemi të shokuar në selinë qëndrore për vdekjet tragjike.
Jemi trishtuar thellësisht pasi mësuam për humbjen e jetëve të dy ushtarakëve shqiptarë, nëntetare Zarife Hasanaj dhe major Klodian Tanushi, të cilët ishin pjesë e grup-batalionit kanadez të Prezencës së Përparuar të Përforcuar të NATO-s.
Ata po kryenin një shërbim të rëndësishëm që kishte të bënte me asgjësimin e sigurt të mjeteve plasëse.
Ne mbajmë zi për ta dhe i shprehim ngushëllimet më të thella familjes dhe të dashurve të tyre por edhe gjithë kombit shqiptar për humbjen tragjike.
Sekretari i Përgjithshëm i NATO-s Jens Stoltenberg dhe Aleatët ua përcollën ngushëllimet e tyre Shqipërisë në Këshillin e Atlantikut të Veriut për këtë humbje të tmerrshme.
Burrat dhe gratë nën uniformë me mision e Prezencës së Përparuar të Përforcuar të NATO-s përfaqësojnë shpirtin unik të solidaritetit tone Euro-Atlantik dhe të sigurisë kolektive.
Ata vijnë nga vende të ndryshme por ata punojnë së bashku për një qëllim të përbashkët: të mbrojnë sigurinë e kombit tonë dhe të qytetarëve tanë, nën principin udhëheqës të mbrojtjes sonë kolektive “Një për të gjithë, të gjithë për një”
Ne qëndrojmë plotësisht të përkushtuar për të përmbushur misionin tonë, ne do vijojmë të marrim të gjitha masat e nevojshme për të garantuar sigurinë e personelit tonë në misione dhe të ndalojmë që të tilla aksidente të ndodhin përsëri në të ardhmen.
NATO e vlerëson thellësisht kontributin e Shqipërisë për sigurinë euro-atlantike, përfshirë pjesëmarrjen në misionet dhe operacionet tona.
Ne kurrë nuk do ti harrojmë ata që bënë sakrificën më sublime. Mendimet tona janë me familjarët dhe të dashurit në këtë kohë të vështirë/ Opinion.al E.Xh.
